Myftinia e Tiranës reagoi sot lidhur me përplasjen e ditës së zgjedhjeve me ditën e Bajramit, më 25 qershor. Nëpërmjet një prononcimi për mediat, Myftiu Ylli Gurra, nuk foli për veprime të qëllimshme nga ana e përfaqësuesve të politikës.
Por ai u bëri thirrje të gjithë individëve dhe forcave politike të jenë të kujdesshëm e të përmbajtur gjatë fushatës zgjedhore dhe ditën e zgjedhjeve që përkon me ditën më të rëndësishme në kalendarin festiv të islamit, Bajrami i Madh.
Ai tha se është me shumë rëndësi që Muaji i Shenjtë i Ramazanit të kalojë në qetësi e harmoni dhe në këtë drejtim, politika ka një rol të madh, referuar paralelizmit që kanë dy ngjarjet, argjërimi dhe fushata zgjedhore.
Deklarata e plotë:
“Dita e Bajramit të madh mendohet të jetë të dielën e 25 qershorit 2017. E caktuar kjo në të njëjtën datë me ditën e zgjedhjeve, të cilat ne komuniteti fetar, të gjithë qytetarët do të japim mesazhin tonë përmes sjelljes në udhëheqësinë e vendit të një klase të caktuar politike.
Ndjejmë detyrimin që atmosferën e pararamazit, 27 maj, dhe gjithë muajin e Ramazit që përkon me fushatën zgjedhore, bëjmë thirrje, kërkojmë nga çdo besimtar të jenë të kthjellët dhe të përkushtuar në devotshmëri për përcjelljen e muajit të Ramazanit ashtu siç i ka hije çdo myslimani.
I drejtohemi klasës politike që të jenë të kujdesshëm, të matur dhe të krijohet një atmosferë sa paqësore aq dhe komunikative brenda kornizave njerëzore e qytetare, në mos nëpërkëmbin e vlerave të Ramazanit.
E drejta e votës, e përzgjedhjes së atyre që do marrin përgjegjësinë e drejtimit të vendit tonë përkrah kombeve të qytetëruara, është përgjegjësi sa historike aq edhe qytetare e momentit.
Ne dëshirojmë dhe apelojmë që atmosfera e Ramazanit të jetë sa më paqësore si dhe besimtarët dhe jo besimtarët të vendosin në 25 qershor që fatet e tyre t’i marrë ajo elitë politike e cila do të marrë votëbesimin nga këta qytetarë.
I bëjmë thirrje agjëruesve që të jenë të kthjellët në muajin e tyre të begatë si dhe të vendosin lirshëm dhe në mënyrë të plotë, me vullnet të lirë, se cilët duhet ta drejtojnë apo jo shtetin dhe kombin tonë në këto momente”.
