Deputeti i Partisë Demokratike, Luan Baçi, akuzoi kryetaren e Kuvendit Lindita Nikolla, se i kanë ndryshuar vendin e uljes në sallën e Parlamentit pa e informuar. Nga salla e Kuvendit, Baçi u shpreh i indinjuar nga ky gjest, pasi dikush i kishte thënë që vendin e ka në korridor. Luan Baçi, pjesë e Komisionit të Rithemelimit, gjatë fjalës së marrë në seancë tha se kryetarja e Kuvendit nuk është drejtoreshë shkolle, e cila me urdhër të Lulzim Bashës të dënojë deputetët duke i ulur në vend të fundit. Tejet i revoltuar, ai shtoi më tej se ata që e përjashtojnë nga grupi parlamentar, janë vetëm votuesit demokratë.
“Tek vendi ku doja të ulesha, gjeta një emër tjetër. Të paktën ju paradhënie kur merrni një porosi nga një deputet i zakonshëm siç është z. Basha, që mund t’ju sjellë shkresë pas shkrese për të ndërruar vendet e deputetëve si nxënësit në shkollë dhe ju jeni drejtoresha e shkollës, ku duhet të dënoni një nxënës duke e çuar në vendin e fundit. Përpara se të bëni veprime të tilla, ne duhet të informohemi që mos të përballemi me situata të pazakonta.
Dikush më tha që emrin e ke në korridor. Mendoj që këtë vendin këtu, nuk ma keni caktuar as ju, as z. Basha! Unë jam deputeti më i votuar nga 6 deputetët e opozitës të qarkut të Fierit. Mua më përjashtojnë nga grupi parlamentar vetëm votuesit demokratë, dhe jo ju me z. Basha. Është mbyllur historia e mbajtjes peng të një personi që është peng i mazhorancës, është mbyllur në 11 dhjetor”, tha Baçi.
