“Arrest me burg” me afat 30 ditor është masa e sigurisë caktuar sot nga Gjykata e Tiranës për Elinta Garon, 29 vjeçaren e cila aksidentoi për vdekje një person dhe plagosi dy të tjerë. Garo është përlotur në sallë dhe nuk ka pranuar të ketë qenë duke përdorur celularin në momentin e aksidentit, që i mori jetën 60-vjeçarit, Begzan Hyseni.
Gjatë kësaj kohë do të kryhet ekspertiza auto-teknike e automjetit që ajo drejtonte, dhe që u aksidentua në afërsi të Liqenit Artificial, në zonën e “Kodrës së Diellit”.
60-vjeçari ndërroi jetë në spitalin e Traumës, pasi u përplas nga makina në afërsi të zonës së njohur si “Kodra e Diellit” në Tiranë.
29-vjeçarja Elinta Garo humbi kontrollin e makinës dhe përplasi në trotuar tre këmbësorë, 27-vjeçaren Alkuna Telhaj dhe çiftin Hyseni. Fatkeqësisht, Begzan Hyseni nuk ka arritur t’i mbijetojë plagëve të rënda, dhe ndërroi jetë në spital.
