Deputeti Kostaq Papa kritikoi në seancën e sotme plenare qeverinë, pasi, kjo e fundit nuk i ndihmon fshatrat shqiptare brenda kufirit grek.
Papa mori fjalën menjëherë pas ministres së Infrastrukturës dhe Energjisë, Belinda Balluku, ku përmendi tunelin e rrugës së Sarandës, për të cilin shprehet se duhet të bëhet pasi nga ai përfiton edhe Çamëria.
“Meqë para meje ishte ministrja e Infrastrukturës e këshilloj që të rishikojë edhe njëherë tunelin e rrugës së Sarandës, sikur edhe me vjedhje të jetë ai të bëhet, se ju keni për t’i vjedhur paratë, por të bëhet, se nga ai përfiton edhe Çamëria.
Ju shkatërruat Leskovikun. Si do të ndihmoni fshatrat shqiptare matanë kufirit, Konicës, Gramozit, Delvinaqit, çfarë do u thoni atyre, që do i ktheni në etni shqiptare sikur kanë qenë dhe janë prej shekujsh. Edhe marrëveshja që ofruat për detin ishte po aq tradhtare sa e para”, tha Kostaq Papa.
Ndërkohë, lidhur me këtë deklaratë, ka reaguar deputeti Ligoraq Karamelos që mbron të drejtat e minoritetit grek në Shqipëri, i cili kërkon që situata mos të acarohet, pasi janë çështje të ndjeshme.
“Të distancohemi nga parafolësi nga përdorimi i disa shprehjeve që tingëllojnë anakronike. Si mund të flitet sot për fshatrat të aneksuara që i përkasin një shteti tjetër europian. Janë cështje të ndjeshme dhe sensitive, deputeti ka të drejtë të thojë ç’të dojë, por jo të acarojë situatën”, tha Karamelo.
