Kryeministri i Maqedonisë së Veriut, Zoran Zaev ka kundërshtuar përfshirjen e tij në skandalin e njohur si “reketi”, pas publikimeve të video përgjimeve nga gazeta italiane “La Verita”. Në këtë skandal dyshohet të jetë e përfshirë edhe prokurorja speciale, Katica Janeva.
Dy bashkëpunëtorë të Janevës i kanë marrë afaristit, Orce Kamçev 1.5 milion euro që ta shpëtojnë nga paraburgimi lidhur me një aferë tjetër korruptive me godinën e VMRO-së opozitare.
Në videot e publikuara dallohet momenti kur protagonistët e skandalit marrin paratë e premtuar, ndërsa në një nga videot, dëgjohet një bashkëpunëtor i Janevës teksa i premton se për këtë çështje ka biseduar edhe me kryeministrin, Zoran Zaev, me qëllim që të mos shfaqen probleme.
Përmes një statusi në llogarinë e tij në “Facebook”, Zaev shkruan: “Në mënyrë kategorike i hedh poshtë këto gënjeshtra apo çfarëdo qoftë lidhje, bashkëpunim ose komunikim me të dyshuarin Bojan Jovanovski në lidhje me rastin ‘Zhvatja’.
Pres që hetimet për këtë çështje të përfundojnë sa më shpejtë dhe fajtorët të dalin para ligjit. Përgjegjësit apo trilluesit dhe ata që bëjnë gjithçka për të shpëtuar, nuk mund të hiqen si viktima. Ato që thuhen në audio-përgjim janë gënjeshtra dhe marrëzi të qëllimshme për të përforcuar pozicionin dhe fuqinë para bashkëfolësit .”
Në audio-përgjimin që është publikuar këtë të shtunë, dëgjohet se si Bajon Jovanovski i njohur si Boki 13 e që është edhe pronar joformal i një televizioni, afaristi Orce Kamçev dhe prokurorja speciale Katica Janeva, janë në komunikim të vazhdueshëm me njëri-tjetrin. Jovanovski flet për miqësinë me kryeministrin e Maqedonisë së Veriut, Zoran Zaev dhe fotot që ai ka bërë me të në studiot televizive.
