Kreu i PD-së, Lulzim Basha, ka hedhur akuza ndaj qeverisë duke thënë se është kthyer në një PPP që po plaçkit shqiptarët. Sa i takon vendimit të ish-kryeministrit Berisha, theksoi se nuk do të cënohet aleanca dhe partneriteti i PD-së me SHBA-në, duke mos pasur më kthim pas për vendimin e përjashtimit të tij.
“77 votat e sotme janë formalizim i PPP-së, Rama-Doshi-Rakipi bashkë me kriminelët e dosjes 184 të vjedhjes së zgjedhjeve në Dibër dhe Shijak. Janë fatkeqësia më e madhe për çdo shqiptar.
Rama-Doshi-Rakipi janë fatkeqësia më e madhe për çdo shqiptar dhe fatkeqësia kombëtare. Qëllimi i kësaj PPP, i kësaj pakice plaçkitësish është të pasurojnë vetën e tyre në kurriz të shqiptarëve.
Qëllimi ynë është të bëjmë gjithçka për të larguar këta armiq nga salla e parlamentit, dhe kthejmë shqiptarëve demokracinë dhe parlamentin. Nuk kam asgjë për ti shtuar asaj që kam deklaruar një javë më parë, sa i përket kontributit të Sali Berishës për zhvillimin e Shqipërisë, demokracisë dhe aleancës me SHBA, por dua të jem fare i qartë, aleanca dhe partneriteti i PD-së me SHBA-në duhet dhe do të mbetet i pacenueshëm në interesin më të mirë të demokratëve shqiptarë dhe të së nesërmes së Shqipërisë. Për këtë arsye, ne së bashku me të gjithë shqiptarët, do të bëjmë gjithçka për të realizuar aspiratën e tyre për ndryshim. Nuk ka kthim pas”, tha Basha.
