Ditën e sotme u zhvillua një mbledhje e posaçme e Byrosë së Kuvendit të Shqipërisë, ku u vendos që paga e deputetëve të përgjysmohej për një periudhë tremujore.
Mbledhja e cila u zhvillua online, u drejtua nga kreu i Kuvendit, Gramoz Ruçi. Ky vendim u mor në kuadrin e masave për të lehtësuar përballimin e situatës së pandemisë, krijuar nga koronavirusi dhe në shenjë solidariteti me qytetarët dhe bizneset e prekur nga masat ndaluese të COVID-19.
Gjithashtu, Ruçi u është drejtuar me një letër drejtuesve të 30 institucioneve kushtetuese dhe institucioneve të krijuara me ligj, të marrin të njëjtën nismë, për përgjysmimin e pagës së tyre për një periudhë tremujore, si kontribut në lehtësimin e përballimit të nevojave për parandalimin e përhapjes së këtij virusi të rrezikshëm.
