Ish-deputetja e PD-së Grida Duma pasditen e sotme ishte e ftuar në rubrikën “Opinion” në “News 24” prej ku komentoi situatën aktuale politike në vend.
Ndër të tjera Duma foli edhe për përgjimet e publikuara nga gazeta gjermane BILD, duke theksuar se ato i kanë shastisur njerëzit: “Përgjimet i kanë shastisur njerëzit, por pavarësisht kësaj askush nuk thirret në prokurori. Unë po të jem prind i njërit prej studentëve, apo të rinjve në burgje pse ka dalë të protestojë, qoftë edhe pse ka hedhur një shashkë nuk e di si do ndjehesha, kjo nuk ka ndodhur as në kohën e regjimit. Kryeministri ka kapur të gjitha institucionet, vendi është pa gjykata, prokuroria e kapur ka kaluar edhe afatet e dy dosjeve 339 dhe 184”.
Ndërsa lidhur me përplasjet mes militantëve të PD-së dhe policisë, Duma tha se kjo është një tjetër pasojë e mungesës së gjykatave në vend: “Në Shkodër përplasen policitë se këtu nuk ka Gjykatë Kushtetuese. Ndaj edhe neve i lamë mandatet, ndaj dolëm nga sistemi se s’ka sistem. Nuk mundet që KQZ të tejkalojë, Presidentin, kështu e parashikon Kushtetuta”.
