Ish-ministri i Infrastrukturës, Damian Gjiknuri, është kthyer tashmë në personazhin më të lakuar të përgjimeve. Ai dëgjohet teksa shprehej se do të dërgonte ‘çuna problematikë’ si përforcime për shtabin elektoral në Dibër. Lidhur me këto përgjime, ai ende nuk ka dhënë një sqarim për atë që është publikuar.
Sakaq, në një postim së fundmi në rrjetin social Facebook, ai ka publikuar një foto me të rinjtë socialistë, ndërsa nuk lë pas edhe ironinë. Sipas Gjiknurit, të rinjtë e FRESSH janë ‘çunat problematikë’.
“Mirëmëngjes
Pranë furgonit me gocat dhe çunat “problematik” të Forumit Eurosocialist të Vlorës, me të cilët po udhëtojmë në çdo lagje, për të prezantuar Dritan Lelin dhe skuadrën e Partisë Socialiste në Këshillin Bashkiak”, shkruan ai bashkëngjitur fotos në fjalë.
Gazeta gjermane “Bild”, ka publikuar mbrëmjen e së mërkurës 10 përgjime të reja, megjithëse gazetari i saj Peter Tiede kishte paralajmëruar se do të publikoheshin mëngjesin e së enjtes.
Në rreth 13 minuta përgjime të zbardhura, dëgjohen të flasin aktorë të ndryshëm politik, por edhe persona të tjerë. Bisedat telefonike lidhen me zhvillimin e zgjedhjeve në qarkun e Dibrës.
Në një nga përgjimet, Damian Gjiknuri dëgjohet të bisedojë me Shefin e Policisë Dibër, Rober Aga, për rezultatin e zgjedhjeve.
