Pas takimit të zhvilluar paraditen e sotme me presidentin Bajram Begaj, kreu i grupit parlamentar të Partisë Socialiste, Taulant Balla, është prononcuar për mediat ku ka dhënë afatet e mundshme për datën e zgjedhjeve.
Ai u shpreh se një afat i mundshëm për zhvillimin e zgjedhjeve lokale është periudha nga data 15 prill deri në 15 maj, duke marrë parasysh edhe festat zyrtare që mund të rastisin brenda këtyre datave.
Balla pohoi se PS është e gatshme që të hyjë në zgjedhje, dhe t’i fitojë ato në datën e caktuar nga presidenti Begaj.
“Mendoj që të gjitha partitë politike duhet të zbatojnë kompetencën e drejtpërdrejtë të Presidentit të Republikës. Një gjë është e sigurtë, që zgjedhjet mund të zhvillohen brenda afatit 15 prill-15 maj duke marrë parasysh ndonjë festë zyrtare brenda këtij afati.
Nuk kemi dhënë propozim për ndonjë datë të caktuar. PS është e gatshme të marrë gjithmonë pjesë në zgjedhje dhe t’i fitojë ato. Ajo që vërej me vlerësim maksimal është gatishmëria e presidentit, për të dëgjuar të gjithë aktorët politikë”, deklaroi ai.
