Ka përfunduar seanca në Gjykatën Speciale në Hagë, ndaj ish-presidentit të Kosovës, Hashim Thaçi.
Thaçi, nuk pranoi asnjë prej akuzave të ngritura nga Gjykata Speciale.
“Akuza është krejt e paqëndrueshme dhe deklarohem i pafajshëm plotësisht. Ritheksoj se akuza është krejt e paqëndrueshme, deklarohem i pafajshëm për të gjitha pikat e akuzës si të paqëndrueshme”, tha ish-kreu i shtetit të Kosovës.
Ndërkohë, avokati i tij mbrojtës, David Hooper, tha në seancë se në aktakuzat ndaj Thaçit, nuk ka asnjë pretendim për “trafikun e organeve’ apo për “Shtëpinë e Verdhë”.
Në fjalën e tij, avokati u shpreh se do të dërgojë mocion për lirimin me kusht të Thaçit.
“Pyetja që do bëjmë ne është: A e meriton ky person të qëndrojë i paraburgosur apo jo? Duke pasur parasysh edhe prezumimin nga kjo Gjykatë që prezumohet liria përveç rasteve kur ka disa arsye për të justifikuar paraburgimin”, tha Hooper.
Aktakuza ndaj Thaçit është konfirmuar më 5 nëntor dhe mbi të rëndojnë 10 akuza, për krime kundër njerëzimit dhe krime lufte.
Përveç Thaçit, Specialja ka konfirmuar aktakuzën edhe ndaj tre pjesëtarëve tjerë të Ushtrisë Çlirimtare të Kosovës, Jakup Krasniqit, Rexhep Selimit dhe Kadri Veselit.
Sot para gjykatësve në Hagë është paraqitur edhe Jakup Krasniqi, i cili tha se është i pafajshëm për akuzat që e rëndojnë nga Specialja.
