Me përfundimin e mandatit të prokurorit të përgjigjëm, Adriatik Llalla, ka nisur sot zyrtarisht në Komisionin e Ligjeve procedura për zgjedhjen e një prokurorit të përkohshëm deri në zgjedhjen e prokurorit të ri të përgjigjëm nga Këshilli i Lartë i Prokurorëve që pritet të krijohet.
Kreu i Komisionit të ligjeve, Ulsi Manja, nga Partia Socialiste tha se për zgjedhjen e prokurorit të përkohshëm nuk nevojitet shumica e cilësuar prej 84 deputetësh, por shumicë e thjeshtë prej 71 deputetësh në Kuvend.
Komisioni i ligjeve pritet të vendosë një afat 5 ditor për depozitimin e dokumentacionit nga kandidatet që do të përfshihen në këtë garë dhe me pas do të zhvillojë seancë dëgjimore me të gjithë ata që plotësojnë kriteret e parashikuara në ligj.
Me pas kandidatura e përzgjedhur i kalon seancës për votim që në dispozitat kalimtare parashikohet të miratohet me një shumice të thjeshtë.
Eduard Halimi i Partisë Demokratike kundërshtoi ashpër çdo kryeprokuror që do të emërohej nga partitë politike, pasi sipas tij, “prokurori i përgjithshëm duhet të zgjidhet nga Këshilli i lartë i Prokurorëve.”
“Çdo tentativë për të emëruar prokurorin e përgjithshëm me më pak se 84 vota do të jetë jo vetëm thikë në shpinë reformës në drejtësi por edhe sistemit të drejtësisë.”
