Kryetari i Komanduar i PD-së, Enkelejd Alibeaj, ka reaguar pas vendimit të marrë nga Gjykata e Tiranës për njohjen e statutit të miratuar në “11 Dhjetor”. Në një deklaratë për mediat, Alibeaj e cilësoi vendimin skandaloz, ndërsa solli në vëmendje se gjyqtari i çështjes ka deklaruar më herët anësinë e tij në këtë proces gjyqësor.
“Jemi njohur për vendimin e Gjykatës së Tiranës. Njohuritë e mia juridike dhe besoj njohuritë e kujtdo që njeh nga media se si zhvillohen gjyqet, për mua është një vendim në nivelet e skandalit.
Siç e dini ju edhe vetë gjyqtari ka deklaruar njohjet dhe anësinë e vet në lidhje me këtë çështje. Së dyti, PD ka bërë ankim për regjistrimin e Kuvendit të datës 18 Dhjetor, është i fundit që PD ka realizuar. Çështja është në Apel bashkë me të gjithë dosjen, bashkë me të gjitha provat. Gjyqtari sot nuk ka pasur dosjen dhe ka marrë një vendim pa pasur prova, pa pasur dosje dhe mbi të gjitha pa pasur palë. Do të bëjmë kallëzim penal për gjyqtarin për “Shpërdorim detyre'”, tha Alibeaj.
Vendimet që mori Kuvendi 11 Dhjetorit:
1-Konstatimin e pavlefshmërisë absolute të zgjedhjes në mbledhjen e Këshillit Kombëtar të datës 30.08.2021, të nënkryetarëve të PD, të Sekretarit të Përgjithshëm dhe sekretarëve funksionalë të saj, të Kryetarit të Komisionit të Apelimit, Integritetit dhe Etikës, Kryetarit të Komisionit Zgjedhor të Partisë, si të zgjedhur në kundërshtim flagrant me nenit 44 të statutit të PD në fuqi në kohën e mbajtjes së mbledhjes.
2-Ndalimin e tyre për ushtrimin e detyrave përkatëse, si të paligjshme në ato funksione.
3-Konstatimin e pavlefshmërisë së mbledhjes së konstituimit të kryesisë së PD, të datës 15.11.2021, për shkak të pjesëmarrjes në të të personave të pazgjedhur sipas dispozitave statutore dhe mungesës së kuorumit dhe legjitimitetit për t’u mbledhur.
4-Konstatimin e pavlefshmërisë absolute të vendimit, numër 139, datë 15.11.2021, të kryesisë së PD, si një vendim i marrë nga një organ i pakonstituar në mungesë të kuorumit dhe në kundërshtim flagrant me dispozitat statutore, përkatësisht nenet 43 dhe 45 të statutit të PD, në fuqi, në momentin e marrjes së tij.
5-Anulimin e thirrjes publike dhe të njoftimit të degëve të PD për mbajtjen e Kuvendit Kombëtar të PD të datës 18 Dhjetor 2021, ora 11, sipas vendimit numër 139, date 15 Nëntor 2021 të kryesisë së PD. Ky vendim hyn në fuqi menjëherë.
