Ish-deputeti i PD-së, Agron Shehaj ka publikuar disa dokumente me anë të cilave ai akuzon kryeministrin Rama, për një tjetër koncesion. Nëpërmjet një statusi në Facebok, Shehaj shprehet se qeveria ka shpallur në fshehtësi të plotë nga gjykata, fituesin e tenderit për kontrollin e pompave të naftës.
“Nëpërmjet një procedure konkurrimi me një ofertues dhe të jashtëligjshme, qeveria ka shpallur kompaninë “Noa control” fitues të koncesionit për kontrollin e pompave të naftës. Ky tender është bërë në fshehtësi të plotë sepse gjykata ka kërkuar modifikimin e kritereve të garës”, shkruan ai në postimin e tij.
Ndër të tjera, Shehaj thekson se kontrolli i pompave të naftës kryhej nga shteti dhe ishte një aktivitet fitimprurës, sepse sillte në arkat e shtetit mbi 5 milionë euro në vit.
Postimi i Plotë:
Nëpermjet një procedure konkurrimi me një ofertues dhe të jashtëligjshme, qeveria ka shpallur kompanine “Noa control” fitues të koncesionit për kontrollin e pompave të naftës.
Ky tender është bërë në fshehtësi të plotë, si pasojë e ankesave për fitues të parapercaktuar gjykata ka kërkuar modifikimin e kritereve të garës.
Kontrolli i pompave të naftës kryhej nga shteti dhe ishte një aktivitet fitimprures sepse sillte në arkat e shtetit mbi 5 milionë euro në vit.
Kompania “Noa Control” do të investoj vetëm rreth 600.000 euro dhe nga koncesioni njëzetvjeçar do të përfitojë minimalisht 100 milionë euro nëse tarifat e kontrollit do jenë të njëjta.
Vjedhja nëpërmjet këtij koncesioni është marramendëse dhe kjo është arsyeja pse fituesi i garës së këtij koncesioni ishte i parapercaktuar.
I bëj thirrje Prokurorisë të hetojë këtë aferë korruptive flagrante në shkelje të ligjit.
