Pas qëndrimit publik të Yuri Kim, Komisioni i Rithemelimit të PD-së ka sulmuar ashpër ambasadoren e SHBA-së në vendin tonë e cila njohu Enkelejd Alibeajn si liderin e komanduar të PD-së gjatë takimit të djeshëm mes tyre.
“Foltorja” akuzoi diplomaten amerikane se injoroi parimin themelor të demokracisë, votën, referuar rezultatit të zgjedhjeve të pjesshme lokale të 6 marsit, ku PD-ja zyrtare u rendit në vendin e fundit, Kuvendin e 11 dhjetorit që shkarkoi Lulzim Bashën dhe n/kryetarët e tjerë të PD-së dhe vendimin e fundit të Gjykatës së Tiranës në 25 mars që njohu ndryshimet statutore të këtij kuvendi. Për sa i përket njohjes së Alibeajt si drejtues i përkohshëm i selisë blu, Komisioni i Rithemelimit e quan deklaratën e Kim qesharake dhe absurde.
“Ambasadorja Yuri Kim injoroi themelin e demokracisë së shtetit të saj “We, the People” (Ne, Populli). Yuri Kim hyri sot në Kuvendin e Shqipërisë për një takim me kreun e grupit parlamentar të PD, Enkelejd Alibeaj, por kur doli, me anë të një deklarate e shpalli atë në mënyrë qesharake dhe absurde si kryetar të Partisë Demokratike. Yuri Kim shkelmoi mbi vendimin e gjykatës që konfirmoi verdiktin e demokratëve në Kuvendin e 11 dhjetorit. Ajo gjithashtu injoroi edhe votën e zgjedhësve të shprehur qartë më 6 mars ”, shprehet fillimisht “Foltorja”.
“Foltorja”: Kim i shërben Ramës
Komisioni i Rithemelimit të PD-së thelloi më tej akuzat politike ndaj ambasadores amerikane në vendin tonë, duke e konsideruar si shërbëtore të kryeministrit Edi Rama pasi po mbajnë peng opozitën shqiptare. Në fund, “Foltorja” deklaron se vlerat e SHBA-së nuk janë ato që përfaqëson ambasadorja Yuri Kim (arroganca, diktati dhe diversioni), por vota e lirë.
“Yuri Kim vërtetoi se është në shërbim të lojërave të Edi Ramës për të dobësuar dhe për të mbajtur sa më gjatë peng opozitën, duke komanduar për kryetar ata që u refuzuan me votë masive nga demokratët. Për fat të mirë, shqiptarët e kanë kuptuar se vlerat e vërteta të SHBA-së nuk janë arroganca, diversioni apo diktati, por vota e lirë dhe demokracia”, mbyllet qëndrimi i “Foltores”.
Paloka: Yuri Kim nuk mund të dalë mbi gjykatat shqiptare!
Deputeti e njëkohësisht anëtari i “Foltores”, Edi Paloka, ka shpërthyer dje në akuza të ashpra ndaj ambasadores amerikane Yuri Kim. Ai e cilësoi mëse të turpshme njohjen e Alibeajt si kryetar të përkohshëm të PD-së. Paloka shtoi se Kim nuk mund të dalë mbi vendimet e gjykatave shqiptare, duke iu referuar vendimit të Gjykatës së Tiranës në 25 mars.
Ish-kreu i Këshillit Kombëtar të PD-së mbajti qëndrimin se ambasadorja amerikane po përçan opozitën dhe përkrah qeverinë e korruptuar të Edi Ramës. “Ky është më tepër se turp, është shkelje e jo vetëm çdo etike, por dhe ligjeve të Republikës së Shqipërisë! Kjo zonja uroi Ramën për ‘fitoren historike’ pa mbaruar akoma procesi zgjedhor më 25 prill ; doli hapur në mbështetje të qeverisë më të korruptuar në rajon (siç e cilëson vetë DASH) dhe prej kohësh është angazhuar në vetë të parë në përçarjen e opozitës shqiptare. Ti, zonjë mund të takosh kë të duash dhe si të duash, por nuk mund të vendosesh mbi gjykatat shqiptare e sidomos mbi vullnetin e lirë të demokratëve shqiptarë”, shprehej Paloka.
