Deri sa të kemi një vaksinë, pritet të ketë valë të reja epidemike. Ky është shqetësimi i ngritur nga Walter Ricciardi, përfaqësuesi italian i OBSH dhe këshilltar i Ministrit të Shëndetësisë.
Ai është i mendimit se një valë e dytë e epidemisë në vjeshtë, më shumë sesa një hipotezë, është një siguri. Për rrjedhojë, heqja e izolimit do ishte një hap i gabuar.
“Disa lider kombëtar dhe ndërkombëtar, me zgjedhjet e tyre të rrezikshme, janë përgjegjës për efektet që do të ketë pandemia mbi popujt e tyre. Shembulli më i habitshëm është ai i Britanisë së Madhe dhe Shteteve të Bashkuara, ku qeveritë nuk kanë dëgjuar këshilltarët shkencorë dhe kanë reaguar jashtëzakonisht vonë.
Nga ana tjetër, në vendet si Koreja e Jugut, Finlanda dhe Gjermania, ku ka një marrëdhënie të drejtpërdrejtë midis politikës së ndjeshme dhe institucioneve që funksionojnë mirë, gjërat janë më mirë se diku tjetër”.
Vendin e parë në botë për numrim më të madh të viktimave e zë Amerika. Në SHBA deri më tani janë shënuar 37.175 viktima dhe rezultojnë të infektuar 710.272 të tjerë. Virusi po bën ‘kërdinë’ edhe në Europë. Numri i viktimave në Itali ka shkuar në 22.745, ndërsa në Spanjë kanë humbur jetën 20.002 qytetarë.
