Çdo ditë e më shumë, policia njofton me anë të rrjeteve sociale lidhur me personat të cilët vënë jetën në rrezik në rrugë, duke drejtuar mjetin jashtë normave të lejuara. Policia Rrugore ka shtuar masat për parandalimin e aksidenteve rrugore.
Më konkretisht, masat kanë konsistuar në parandalimin e shpejtësisë apo manovrave të rrezikshme në rrugë, drejtimin e mjetit nën efektin e alkoolit apo në gjendje të dehur, për mosvendosjen e rripit të sigurimit, për përdorimin e celularit gjatë drejtimit të mjetit.
Por pavarësisht masave strikte, ka ende shumë drejtues mjetesh të cilët nuk i marrin në konsideratë. Ministri i Brendshëm, Sandër Lleshaj, ka ndarë me ndjekësit në rrjetin social Facebook, një pyetësor të bërë nga Policia Rrugore. Pyetja i referohet përdorimit të celularit gjatë drejtimit të mjetit. 78% e qytetarëve kanë qenë pro dhe 22 % kundër.
Ja se çfarë shkruan ministri Lleshaj:
Reagim inkurajues i qytetarëve ndaj reformave të pritshme në fushën e sigurisë rrugore.
Mbi 10 mijë qytetarë u përgjigjën në harkun e 21 orëve dhe rreth 80% e tyre i përgjigjen pozitivisht pyetjes së parë, për ndalimin e përdorimit të celularit gjatë drejtimit të automjetit.
Pyetjet e tjera do të vijojnë çdo ditë dhe një ekip i posaçëm do të mbajë shënim të gjitha përgjigjet dhe komentet.
Deri në fund të muajit shkurt, do të marrë trajtë të plotë paketa e reformave të sigurisë rrugore, në bashkëpunim të shumëfishtë me qytetarët, autoritetet, ekspertët dhe partnerët ndërkombëtarë. 2020 – Viti i Sigurisë Rrugore.
