Franca nuk do të lejojë më përdorimin e hidroksiklorinës si ilaç për trajtimin e koronavirusit.
Qeveria franceze mori këtë vendim, pasi OBSH pezulloi këtë javë testimin e hidroksiklorinës dhe të klorokinës, për shkak të shqetësimeve për sigurinë.
Hidroksiklorina, e cila përdoret normalisht për të trajtuar malarien ose artritin, është promovuar më herët nga virologu francez, Didier Raoult.
Ky i fundit është takuar me presidentin Macron, për të diskutuar përdorimin e saj si trajtim për pacientët me koronavirus.
OBSH pezulloi testimin e saj dhe të klorokinës, pasi një studim në revistën mjekësore britanike “The Lancet” ka konstatuar se përdorimi i këtyre ilaçeve mund t’i rrisë shanset e pacientëve për të vdekur.
Sipas studimit, ato mund të prodhojnë efekte anësore, sidomos aritmi të zemrës.
