Presidenti i televizionit ”Fax News”, Kasem Hysenbelliu, i cili u nda nga jeta mëngjesin e të shtunës në moshën 59-vjeçare pas betejës me Covid-19, u përcoll sot për në banesën e fundit.
Paraditen e sotme, miq, të afërm e të njohur, zhvilluan homazhe në nder të tij në ceremoninë e organizuar nga familja.
Ceremonia mortore është parashikuar të mbahet në orën 11:00 në Sharrë, nën zbatimin e rregullave të sigurisë dhe masave anti COVID.
Hysenbelliu, prej ditësh ishte duke u kuruar për Covid-19 në Turqi, ndërsa pak ditë më parë gjendja e tij shëndetësore ishte përkeqësuar.
Prej vitesh, ishte angazhuar në drejtimin e mediave, dhe dy vite më parë u bë themeluesi televizionin ”Fax News”.
Më parë, Hysenbelliu ka qenë administrator i News 24 duke dhënë një kontribut të çmuar në lirinë e medias, por dhe duke ofruar informacionin e duhur për publikun.
Po ashtu, ai ka qenë dhe administrator i gazetës “Panorama”, në atë kohë me tirazhin më të lartë në vend.
