Ish-kryeministri Sali Berisha ka folur për përplasjen mes Belind Këlliçit dhe Evi Kokalarit, të dy anëtarë të Rithemelimit, duke thënë se nuk është në favor të asnjë lobimi. Evi Kokalari akuzoi Belind Këlliçin për lobim dhe manipulim votash në zgjedhjet për anëtarët e Këshillit Kombëtar të PD-së. Ajo nisi një sulm ndaj Belind Këlliçit dhe të rinjve të FRPD-së, duke pretenduar se është manipuluar Këshilli Kombëtar prej tij, për shkak të lobimit të tyre për t’u futur në Këshillin Kombëtar. Në lidhje me këtë çështje, Berisha tha shkurt dhe qartë se nuk është në favor të asnjë lobimi.
“E kam thënë dhe para jush, nuk jam në favor të asnjë lobimi as negativ dhe as pozitiv. Por siç e thatë ju vetë, unë duhet të jem realist. Sot në kohën e smartphonit, varet nga secili. Këlliçi është një bashkëpunëtor shumë i çmuar dhe ka dhënë kontribut të veçantë në të gjithë ecurinë e PD-së, në përpjekje për rithemelimin. Nuk jam për asnjë lloj lobimi. Sqaroj se Evi Kokalari ka kontribut të çmuar, por ajo vendosi vetë të mos kandidojë dhe të tërhiqet në jetën e saj dhe të ndjekë karrierën e saj në Partinë Republikane mesa di unë”, tha Berisha.
