Debate të ashpra ka patur që në nisje të seancës së sotme plenare mes Grupit të Rithemelimit, dhe Partisë Demokratike zyrtare. Deputeti i grupit të Rithemelimit, Edmond Spaho kërkoi ndyshimin e rendit të ditës, pasi sipas tij, duhet të jetë e para interpelanca e kërkuar prej tyre me kryeministrin Edi Rama dhe jo mocioni i debatit me qeverinë i kërkuar nga Partia Demokratike për rritjen e çmimeve. Sakaq, nga ana tjetër, kreu i grupit të PD, Enkelejd Alibeaj u bëri thirrje kolegëve që të mos përfshijnë në Kuvend debatet e brendshme të partisë.
Sipas tij, Kuvendi duhet të kthehet në arenë debati në shërbim të qytetarëve, duke kërkuar nga zv.kryeparlamentarja, Ermonela Felaj që të ndiqte rregulloren.
“Për gjithë qytetarët dhe kolegët që kanë respektin tim maksimal, familja jonë ka rregullat e veta, ka kontributin e vetë gjithsecili. Edhe deputetëve miq të mi, kolegë të mi që çështje të brendshme të mund t’i nxjerrim.
Në mbledhjet e grupit ku të gjithë së bashku jemi kemi të gjitha mundësitë për të bërë kërkesat. E megjithë këtë, sipas procedurës sekretari i grupit u ka dhënë mundësinë të gjithë deputetëve që të flasin.
Një kërkesë për këdo në një familje serioze në respekt të njëri-tjetrit, primare është që ky Parlament ka synimin kryesor mbrojtjet dhe të jetë protektor i interesave të qytetarëve. Të mbrojmë interesat e qytetarëve shqiptarë, me të gjithë mundësitë.
Ky është synimi që kemi ne. Kjo nuk ishte për ju, por ju meqë jeni ulur aty mos krijoni asnjë lloj provokimi për të krijuar skenare të tilla. S’keni të drejtë të gajaseni me këto skena”, tha Alibeaj.
