Duket se opozita e madhe është përçarë dje, teksa është votuar ligji i Vettingut në Policinë e Shtetit. Kështu, Partia Socialiste dhe Lëvizja Socialiste për Integrim kanë bashkuar votat duke miratuar me 88 vota pro ligjin e vettingut në Policinë e Shtetit. Nga ana tjetër, deputetët e Partisë Demokratike kanë votuar abstenim.
Sipas deputetit dhe anëtarit të komisionit hetimor, Enkelejd Alibeaj, përfundimi dhe sjellja e socialistëve në këtë komision është e qartë, por për publikun do të ketë rëndësi zbardhja e së vërtetës, ndërsa paralajmëroi edhe thirrjen e kryeministrit Rama në këtë komision:
“Dihet se çfarë do të bëni ju në komisionin hetimor. Por e vërteta është ajo që ka interes për publikun. E hidhur do të jetë. Meqë ishte një histori me “partizanë”. Ajo çfarë unë besoj se duhet t’i bëhet një pyetje juve dhe publikut është: Ore, ky komandanti i partizanëve, mos është njëri, i cili mban herë pas here një yll të kuq dhe herë një yll të zi të krimit? Edhe ai do të thirret në komisionin hetimor”, tha Alibeaj.
Pas akuzave nga ana e PD-së, ka reaguar deputeti Taulant Balla, i cili paralajmëroi demokratët se përfundimi i komisionit hetimor do të nxjerrë përgjegjësit kryesorë të kanalizimit të vendit në këto 27 vite.
“Ne mezi po presim ta ngremë këtë komision hetimor parlamentar. Ne jemi gati të bëjmë një skaner të plotë 27 viteve të kanabisit në Shqipëri. Ky komision të quhet komisioni i historisë së kanabisit në Shqipëri. Të dalin fajtorët e vërtetë të një historie, që unë jam shumë i sigurt që do të ketë ndokënd në këtë sallë që s’do jetë shumë i gëzuar nga raporti përfundimtar”, deklaroi Balla.
Cilat janë ligjet e tjera që u miratuan?
-Ngritja e task-forcës mjekësore për Ballkanin më 121 vota pro.
-Ratifikimin e marrëveshjes për punësim në bashkëpunim më Gjermaninë, i cili mori 121 vota pro.
