Deklarata e Ministres së Shëndetësisë, Ogerta Manastirliu, për rihapjen e transportit publik, ka sjellë përçarje mes Shoqatave të Transportit. Aktualisht janë ndarë në dy kampe: ata që do rinisin punën nesër, dhe të tjerët që refuzojnë pasi nuk janë plotësuar kushtet e parashtruara.
Në Shkodër, Shoqata e Transportit Interurban ka deklaruar se nesër në orën 06:00 do të nisë nga puna, dhe do të vazhdojë deri në orën 17:00 të pasdites.
Edhe në Korçë, punonjësit e transportit publik kanë deklaruar se do të zbatojnë protokollet e sigurisë. “Kërkojmë me çdo kusht hapjen e transportit publik. Kemi arritur në atë gjendje që sot jemi në fund. Kemi rënë dakord me protokollin me 70%. Ne presim çeljen e transportit”, tha përfaqësuesi i transportit.
Transporti ndërqytetës do të hapet edhe në qytetin e Vlorës. Ndonëse do të nis puna, përfaqësuesit nga Shoqata e Transportit nuk heqin dorë nga kushtet e tyre.
Ato kërkojnë një pagë të dytë lufte, pasi janë dëmtuar ekonomikisht. “Si të gjithë shoqatat e tjera në rrethe kërkojmë subvencion 30%, se shteti thotë që ne duhet të punojmë me 70% të kapacitetit. Nuk e di se sa do të realizohet, por që transporti është më i goditur sot për sot. Shteti na dha 400 mijë lekëshin, duhet të na jepte dhe një 400 tjetër se jemi familjarë”, tha një prej përfaqësuesve të shoqatës.
Nesër do të hapet transporti ndërqytetës edhe në Fier. Ilir Lule, kryetar i Shoqatës së Transportit ka sqaruar se kompanitë kanë pësuar humbje, e megjithatë kjo nuk do të reflektohet në çmim.
“Ne jemi gati të zbatojmë protokollin. Nuk e dinim se do dilte ministrja, ne dolëm këtu në këtë protestë të organizuar më parë. Ne duam vetëm të dalim në punë. Do mbajmë të njëjtin çmim”, u shpreh Ilir Lule, kryetar i Shoqatës së Transportit.
Nga ana tjetër, Eneo Sulejmani, kryetar i shoqatës brenda dhe ndërqytetes në Tiranë ka dalë kundër.
“Ministria e Shëndetësisë hoqi masat kufizuese, por është në fuqi protokolli i sigurisë. Së dyti ne presim një vendim nga Ministria e Infrastrukturës. Është e pamundur që të fillojë transporti, pasi nuk respektohet protokolli. Do konsultohemi me operatorët qytetas dhe ndërqytetas dhe 90% e tyre me këtë protokoll sigurie nuk dalin në punë, e kanë të pamundur.
90% e operatorëve janë për mos rifillimin e punës me këtë protokoll. Ai krijon vështirësi financiare. Së pari në transportin qytetas ul me 75% numrin e udhëtarëve në automjet.
Dhe në transportin ndërqytetas e ul me 50%. Këto janë kosto financiare. Së dyti subjektet përgjegjëse detare dhe ajrore nuk janë përgjegjëse për distancën, por për informimin e tyre, pse ne duhet të ndëshkohemi”, tha ai.
