Shqipëria komuniste, ngurronte të kishte marrëdhënie tregtare me shtetet kapitaliste të Perëndimit. Por në fshehtësi, ajo kryente kontrabandë me organizata të ndryshme kriminale në Itali dhe vende të tjera. Kontrabanda e cigareve dhe mallrave të tjera, që shmangte detyrimet doganore dhe siguronte fitime disa herë më të mëdha, kryhej nga kompania Albatrans, e krijuar më 1967.
Enver Hoxha pranoi propozimin e një hebreu të mbijetuar nga Holokausti falë një familjeje shqiptare, për krijimin e një korridori të lirë kontrabande, me dalje në detin Adriatik. Përmes saj Shqipëria do të mund të shlyente disa borxhe të huaja. Albatrans, përdorej edhe për rekrutimin e agjentëve sekretë, ndaj u vu nën varësinë e Ministrisë së Brendshme. Në nevojë të dëshpëruar për valutë, autoritetet komuniste nuk ngurruan të bashkëpunonin edhe me mafian italiane, dhe organizatën më famëkeqe Cosa Nostra. Ky fakt përmendet edhe një episod të serialit të famshëm italian “Oktapodi”.
