Kryeministri Edi Rama ka folur në lidhje me situatën e krijuar nga koronavirusi në vend, duke u shprehur se për momentin Shqipëria ndodhet tek kurba e sheshtë.
Në një intervistë për News24, Rama tha se deri më tani rezultatet që kanë dhënë masat shtrënguese kanë qenë shembullore.
Kreu i qeverisë sqaron se edhe pse masat i ka marrë qeveria, ato janë propozuar nga komiteti i ekspertëve. Më tej, kryeministri tha se mund të ketë sërish një rritje të kurbës, teksa shton se duhet të mësohemi të bashkëjetojmë me këtë virus.
“Nuk jam unë që të them se kur ka qenë piku. Unë iu besoj shumë epidemiologëve. Rezultatet janë fantastike. Rezultatet janë shembullore, të përballjes së numrit më minimalist të humbjes së jetëve dhe barrës së vuajtjes së plagëve shëndetësore. Është ndërtuar procesi në këtë fluks me hapat e duhur dhe vendimet e duhura. Këto masa i ka marrë qeveria, por i ka propozuar komiteti. Është vullneti i qytetarëve për ti ekzekutuar. Se kemi dëgjuar nga Komitetit i ekspertëve që piku është kaluar në shkurt dhe s’po dëgjoj se e kemi kaluar pikun. Tani jemi tek kurba e sheshtë. Nëse keni parasysh aty, tek vendet e tjera, si Japonia, ajo kishte pika të ulëta në kurbë. Ne s’duhet të surprizohemi me rritjen e kurbës, por të bashkëjetojmë me virusin dhe të futemi në llogore nëse ka rritje të shifrave”, tha ai.
