Kreu i Partisë Demokratike, Lulzim Basha është rikthyer në sheshin ku protestoi për 3 muaj me radhë nën çadër, për të hapur fushatën elektorale për zgjedhjet e 25 qershorit.
Fushata elektorale e Partisë Demokratike nisi me prezantimin e disa prej kandidatëve të rinj për deputetë, të cilët Basha i cilësoi i pjesë e projektit të tij politik.
Duke iu përgjigjur indirekt akuzave ndaj tij për lënien jashtë të shumë figurave më në zë të Partisë Demokratike, Basha theksoi se në listën e kandidatëve për deputetë meritonin të përfshiheshin ata që protestuan bashkë me të dhe jo ata që refuzuan kauzën e tij .
“Ky muaj është sprova për të gjithë ne. Ashtu si vetë muaji i Ramazanit. Do të sjellim “Republikën e Re” për çdo shqiptar dhe çdo shqiptare. Mbrëmë dorëzova listën në KQZ. Kam marrë vendime të vështira, por jo të papritura. Këtu në këtë shesh të madh iu bashkuan projektit tim shumë të rinj dhe të reja. Ata erdhën pa i thirrur kush, pasi fillimi dhe ndryshimi duhet të nisë nga vetja jonë. Në këtë shesh sollëm përfaqësuesit më të spikatur, më të denjë, nga jugu në veri dhe përfaqësues të vlerave. Mbi të gjitha “Republika e Re” do të jetë “republika e vlerave.” Vendimet që kam marrë mbrëmë i kanë ngritur pritshmëritë, e çdo shqiptari. Po çfarë i shtyu këta të rinj e të reja që t’i bashkohen çadrës? Ju i dëgjuat disa prej tyre. Askush prej tyre nuk vjen që të marrë, të gjithë janë të suksesshëm në fushat e tyre”, u shpreh Basha.
