Skandalet për Partinë Demokratike vetëm po shtohen. Kjo parti i ka përdorur shumë më tepër se mendohej kompanitë e lobimit. kësaj herë zbulohen dokumente se si kjo parti ka lubuar për të nxjerrë imazhin e Shqipërisë sa më keq para ndërkombëtarëve.
Sot në “Gazetën TemA” është publikuar një dokument i datës 28 prill 2017 ku lideri i opozitës në atë kohë Basha dhe kreu i PR-së Fatmir Mediu kanë kërkuar një takim me këshilltarin e sigurisë kombëtare Herbert Raymond McMaster për t’i treguar gjykimin e tyre mbi qeverisjen “Rama” në mënyrë që SHBA të reagojë.
Teksa në Tiranë protestohej përpara kryeministrisë, opozita paguante për të zhvilluar një takim 30 minutash midis datës 30 prill dhe 5 maj.
Në dokumentacion, janë përpiluar me hollësi të gjitha deklaratat dhe akuzat e kreut të PD-së Basha në adresë të kryeministrit Edi Rama dhe kabinetit të tij qeveritar.
Ajo që bie më tepër në sy në kërkesën e Partisë Demokratike dhe dy iniciatorëve Basha dhe Mediu, janë deklaratat anti-SOROS dhe përpjekjen për të kanalizuar qeverisjen në shoqëritë e drejtuara prej biznesmenit amerikan George Soros.
” Z. Basha vlerësoi fitoren e Presidentit Donald Trump si një akt dashurie për lirinë dhe bëri një përpjekje për të inauguruar një rrugë me emrin e presidentit amerikan në periferi të kryeqytetit. PDSH kërkon të mposhtë në zgjedhjet e 18 qershorit qeverinë e udhëhequr nga Partia Socialiste dhe e drejtuar nga Edi Rama. Nën udhëheqjen e PS-së qeveria dhe institucionet e Shqipërisë janë degraduar nga njerëz të korruptuar dhe negativë pasi janë aleatë me George Sores dhe fondacionin e tij “Shoqëria e Hapur”,” shkruhet në dokumentacion.
Ndërkohë, dyshja Basha-Mediu i kujtojnë SHBA-ve edhe deklaratat e Edi Ramës gjatë zgjedhjeve presidenciale për kandidaturën e Donald Trump, duke u përpjekur që ai dhe Shqipëria të humbasë mbështetjen e ndërkombëtarëve në mënyrë që Partia Demokratike të vijë në pushtet dhe të forcojë marrëdhëniet.
“Nëse është Partia Demokratike rezulton fitimtare, ne do të zhvillojmë lidhje të forta me administratën “Trump”. Kryeministri i tanishëm Edi Rama kundërshtoi publikisht në CNN Presidentin aktual kur ishte kandidat, duke deklaruar se “Trump” përbën kërcenim për Amerikën dhe pa dyshim një kërcënim për lidhjet shqiptaro-amerikane. ” shkruhet ndër të tjera.
Mësohet se Partia Demokratike ka shpenzuar rreth 1 milionë dollarë për lobing në SHBA ku të paktën 500 mijë euro i ka përdorur veç për të siguruar “mbështetje false” nga Ëashington-i gjatë kohës që qëndronte në çadrën para Kryeministrisë për të rrëzuar Edi Ramën.
Duke ndjekur me kujdes formën dhe strategjinë e përpilimit të këtij dokumentacioni, natyrshëm vjen në mendje shprehja e publicistit Faik Konica i cili shprehej në vitin 1897 se: “Armiqtë e Shqipërisë janë shqiptarët, ndaj edhe vazhdojmë të renditemi ndër kombet e fundit në Evropë”.
