Partia Demokratike i ka drejtuar një kërkesë Prokurorisë së Përgjithshme dhe KQZ-së, ku pretendon se deputeti i PDIU-së, Aqif Rakipi ka të shkuar kriminale në shtetin e Italisë.
Në kërkesë kërkohet verifikimi i të dhënave të deklaruara në formularin e vetëdeklarimit të deputetit, ndërsa ajo është firmosur nga disa deputetë demokratë.
Gjithashtu, PD ka dorëzuar një kërkesë për deputetin socialist Gjetan Gjetani, i cili po ashtu dyshohet se ka kryer veprimtari kriminale në Itali.
“Denoncime nga publiku dhe partnerët pranë Partisë Demokratike përbëjnë indicie për të verifikuar nëse të dy këta deputetë kanë fshehur rekorde kriminale në të kaluarën e tyre në lidhje me aktivitete të paligjshme të kryera në Itali.
Partia Demokratike është e vendosur në betejën e saj për të luftuar krimin, dhe për të nxjerrë krimin nga parlamenti dhe institucionet e shtetit. Në të kundërt, lidhur me këto dy raste por edhe të tjera që po trajtohen nga Partia Demokratike, Edi Rama dëshmon se vazhdon të mbrojë dhe promovojë krimin, se nuk ka vullnet ta zbatojë ligjin e dekriminalizimit, dhe nuk ka vullnet të shkëputet nga krimi dhe aleanca politike me krimin.
Partia Demokratike i kërkon Prokurorisë të veprojë menjëherë e të garantojë zbatimin e dekriminalizimit”, shkruhet në njoftimin e Partisë Demokratike.
Më poshtë kërkesa e grupit parlamentar të PD-së drejtuar Prokurorisë së Përgjithshme dhe Komisionit Qendror të Zgjedhjeve:
Kerkesa by Tirana Today on Scribd
Kerkesa e PD by Tirana Today on Scribd
