Në një kohë kur të gjithë presin një reagim të saj nëse do të lërë mandatin, deputetja Rudina Hajdari e ka ngatërruar edhe më shumë situatën.
Rudina Hajdari ka sjellë një konfuzion brenda radhëve të PD dhe jo vetëm, në lidhje me mandatin e saj. Pas zërave kritikë që erdhën kundrejt saj, ajo zgjodhi që të reagonte përmes rrjeteve sociale.
Me anë të një statusi, ajo sqaronte se po konsultohej me ndërkombëtarët për mandatin, ndërsa dje ka ka bërë një tjetër koment.
Duke etiketuar një numër të lartë personalitetesh në SHBA dhe BE, Hajdari ka shpërndarë një intervistë që sekretari për Marrëdhëniet me Jashtë i Partisë Demokratike Gert Bogdani, ka dhënë për mediat.
Në mënyrë ironike ajo ka shkruar “mirë që ma thatë”. Por për çfarë bëhet fjalë konkretisht?
Bogdani gjatë intervistës deklaroi se nëse Hajdari nuk do të digjte mandatin, qëndrimi i Partisë Demokratike do të ishte i njëjtë si me z. Murrizi: “Besoj se standardet duhet të jenë të njëjta. Nuk mund të bëjmë standarde të dyfishta, nuk ka ndryshime midis Rudina Hajdarit dhe Myslym Murrizit në këtë rast”, duke shtuar gjithsesi që “ajo në dhjetor ishte e gatshme të digjte mandatin”.
Të njëjtën linjë, atë të përjashtimit ka mbajtur dhe ish-kryeministri Berisha mbrëmjen e së enjtes, po në një intervistë televizive për znj. Hajdari.
