Kryedemokrati Lulzim Basha ka argumentuar arsyet e largimit të ish-ministrit të Brendshëm, Fatmir Xhafaj, në “Zonë e Lirë”. Gazetari Arjan Çani e ka ngacmuar kreun e PD, nëse edhe për Sandër Lleshin ka një dosje, kjo duke iu referuar paraardhësve të tij. Ai e cilësoi Lleshin si një vartës të kryeministrit Rama, pasi vjen pa përgjegjësi politike.
Për të, pas largimit të Xhafës qëndrojnë klanet politike dhe bandat kriminale. E thënë qartë, për të Xhafaj është viktimë e një bande ku bën pjesë vetë. Kapoja e kësaj organizate, për të është Rama.
Dimë gjë për këtë Sandër Lleshin? Kur i hapet dosja, sepse e them këtë se u mësuam aq shumë… në fillim Saimir, pastaj…
“PD nuk është autoritet i dosjeve. Dimë që është këshilltar i Ramës. Ministrat janë ekipi politik i vendit. Vijnë si pjesë e një vizioni, dhe kanë si qëllim të përmbushin pritshmërinë e kryeministrit dhe të vetes. Por ky bën ndryshim nga të tjerët, sepse nuk vjen nga politika si gjithë ministrat e tjerë.
Atë që mund të them është që ai është vartës i kryeministrit. Vjen pa përgjegjësi politike, është 100% aty si shkak i vullnetit të Ramës.
Kjo përfaqëson plotësisht kapjen e Ministrisë së Drejtësisë nga Rama, nëse me Tahirin ishim 80 me 20, tani është e gjitha në dorë të tij… pas largimit të Xhafës, është dora e Edi Ramës”.
Pse e hoqi Fatmirin? Thonë se e ka sharë shumë, dhe ai nuk duroi dhe iku…
“Përplasje klanesh politike dhe bandash të fuqishme kriminale qëndrojnë pas tyre. Xhafa është pjesë e një klani dhe një bande. Qëndrimi i Ramës është një qëndrim i një njeriu që përpiqet të kufizojë dëmin. Ai mbrojti Dakon, sepse ai, Dako, sot duhej të ishte në burg. Dako është një njeri i cili e ka bërë të kërcënojë Xhafën…”.
Ç’lidhje ka Dako me Xhafën?
“Fatmiri, Donika, Veliu dhe një sërë zyrtarësh të lartë, po përdoren në këtë luftë të brendshme politike, ku nga njëra anë mbrohet Ministri i Brendshëm, dhe nga ana tjetër fillon shpalosja e një dosje tjetër, që mund të rrezikojë një njeri tjetër të Ramës. Ai e hoqi Fatmirin, se ai nuk ishte 100% nën kontrollin e Ramës, siç do të jetë Sandër Lleshi.
Xhafa është viktimë e një bande ku bën pjesë vetë. Pra është prish pazari i hajdutëve. Rama është kapoja e kësaj organizate”.
S’ke frikë nga këto shpifje?
“Ai dhe policinë e mendimit të krijojë, nuk e mbron dot veten nga e vërteta. Mirë është të mos trembë asnjë, se mua nuk më tremb”.
