Kryetari i Bashkisë së Shkodrës, Bardh Spahia, tha gjatë Kuvendit të PD-së se aty pushtetin e kanë anëtarët dhe jo kryetarët. Ai përçoi mesazhin se Kuvendi i ditës së sotme duhet t’i shkëpusë demokratët nga modeli humbës 8-vjeçar. Gjatë fjalës së tij, Spahiu deklaroi se PD ishte kthyer në një parti pa shtyllë të qëndrueshme, ku një njeri vendoste për gjithçka. Por mbetet me shpresë se ky Kuvend do i shkëpusë nga modeli i humbjes.
“Sot është një ditë e bukur për demokratët. Këto sot pushtetin e kanë anëtarët dhe jo kryetarët. Zemrat e demokratëve mund të shpëtohen vetëm duke thënë të vërtetat e PD. PD ishte kthyer një parti pa shtyllë të qëndrueshme, pa fibër politike, ku një njeri vendoste për gjithçka. Tani vota tregon se kush do të kandidojë, kush do të marrë përgjegjësi. Ky Kuvend duhet të na shkëpusë nga modeli i humbjes. Ne u besojmë njerëzve tanë.
PD është sot një trup i ringjallur nga ushtrimi i demokracisë direkte përmes votës së demokracisë. Të dashur demokratë, kam besimin se përfshirja e anëtarësisë me votë, është gjëja e duhur. Në 6 mars Shkodra mbeti fortesa e vetme e demokracisë, pasi ne mundëm t’u jepnim shpresë atyre se mund të ringriheshim. Fituam në Shkodër se ishim në anën e drejtë me shumicën”, tha Spahia.
