Ish-deputeti demokrat, Tritan Shehu, bën apel për zgjedhje të menjëhershme pasi sipas tij vendi është në një krizë të thellë.
I ftuar në rubrikën “Opinion” në News24, Shehu deklaron se Partia Demokratike nuk do të heqë dorë nga kushti për zgjedhje të lira dhe të ndershme.
“Vendi në një krizë të veçantë dhe kërkohet zgjidhje. Vetëm kjo zgjidhje do të shfryjë tensionet, do krijojë optimizmin dhe do i japë mundësi vendit të zhvillohet. Shqipëria prej 6 vitesh nuk ka asnjë investim të huaj serioz. Investimet janë orientuar drejt Serbisë, Maqedonisë së Veriut. Kërkohet një zgjidhje politike që vjen vetëm në një mënyrë, duke iu krijuar mundësitë qytetarëve të votojnë të lirë.
PD është gati të heqë dorë nga gjithçka vetëm nga krijimi i kushteve për zgjedhje të lira e të ndershme jo. Kemi një krizë shumë komplekse e cila kërkon një zgjidhje globale, e cila mund të vijë vetëm nga një proces i sigurt”, tha Shehu.
Më tej, ish-deputeti komentoi edhe dekretin e presidentit Meta për të mbajtur zgjedhjet vendore më datë 13 tetor, teksa shprehet se ‘aleatët e PD shkuan për t’u regjistruar dhe i gjetën zyrat e KQZ të mbyllura’.
“Data 13 tetor është në bazë të një vendimi ligjor e kushtetues siç ishte dhe anulimi i 30 qershorit. Ata nuk respektuan dekretin e parë, ashtu vepruan dhe me dekretin e presidentit për 13 tetorin. Aleatët e PD shkuan për t’u regjistruar dhe i gjetën zyrat e KQZ të mbyllura. Përgjegjësia bie mbi ata që krijuan një farsë më 30 qershor”, tha ish-deputeti.
