Deputeti i Partisë Demokratike, Edi Paloka, deklaroi para mediave se partia drejtohet nga Komisioni i Rithemelimit. Paloka është shprehur se Alibeaj është i shkarkuar me vendim gjykate. Më tej ai shton se fakti që pranuan Alibeajn si kryetar të grupit parlamentar, u bë për të mos krijuar përçarje në PD. Deputeti i Partisë Demokratike Edi Paloka, akuzon kryetarin e grupit parlamentar demokrat Enkelejd Alibeaj se ka shkelur parametrat që i lejohen detyrës së tij. Në vazhdën e akuzave, ai tha se Alibeaj nuk kontribuon për bashkimin e demokratëve.
“Fillon mbledhjen e grupit me axhendën që la Edi Rama në Kongresin e PS, përjashtimin e deputetëve të PD. Nuk e di si mund të flitet për bashkim, kur fjalët e para të Alibeajt sa deputetë janë të përjashtuar, Sali Berisha është i përjashtuar, gjysma e grupit është e përjashtuar.
Alibeaj ka shkelur të gjitha parametrat që i lejohen edhe një kryetari të grupit, nuk mund të jetë kryetar grupi sepse është shkarkuar nga kuvendi i 11 Dhjetorit dhe në statutin e PD është e qartë që vendi i kryetarit të grupit është paralele me atë të nënkryetarit të partisë.
E kemi pranuar pikërisht për të mos krijuar një klimë përçarëse, për të mos filluar një përçarje të re të PD, për të bashkuar çdo gjë që u prish nga Lulzim Basha dhe nga ata që i shkonin pas.
Partinë Demokratike e drejton Komisioni i Rithemelimit. Kuvendi i 11 Dhjetorit ka ngarkuar Komisionin e Rithemelimit të drejtojë Partinë Demokratike. Është vetëm një grup prej 2-3 deputetësh që mesa duket, vazhdojnë të ndjekin axhendën Basha-Rama. Gjithë pjesa tjetër e grupit kërkon bashkim dhe normalizim të punës së PD”.
Sipas Palokës, Enkelejd Alibeaj ka bërë emërime pa vënë në dijeni askënd, dhe një gjë të tillë e ka bërë edhe në Qarkun e Gjirokastrës.
“Alibeaj ka bërë brenda kësaj jave një numër të madh emërimesh, e ka bërë në kokë të tij pa pyetur askënd. Ka arritur deri aty sa në Qarkun e Gjirokastrës për shembull, ka vajtur dhe ka emëruar një sekretar që i bie të jetë sekretar i Tritan Shehut”.
