Ish numri dy i PD, Astrit Patozi, e ka cilësuar si një farsë zgjedhjet që po mbahen në PD, e që po zhvillohet me urgjencë dhe pa asnjë standard. I ftuar në emisionin “7pa5” në “Vizion Plus”, Patozi u shpreh mjaft i prerë në vendimin se nuk do të jetë i pranishëm në Kuvendin Kombëtar që do mblidhet në 15 dhjetor. Patozi vë theksin te një force e re politike qe duhet të ngrihet për të përfaqësuar elektoratin gri, që është i zhgënjyer nga qeverisja e Edi Ramës, por nuk gjen alternativë te opozita aktuale.
Ish eksponenti i PD, ka komentuar dhe angazhimin e opozitës në protestën e banorëve të “Unazës së Re”.
Me ironi, Patozi është shprehur se sot PD mezi pret të shikojë një grumbull njerëzish që protestojnë, dhe t’u bashkohet.
Në emisionin e mëngjesit, ai ka paralajmëruar se nuk do te marrë pjesë në organizimet për 11 dhjetorin, ditën e themelimit të PD, sepse tashmë nuk e lidh asgjë me PD e Lulzim Bashës.
