Ish-nënkryetari i PD-së, Astrit Patozi u shpreh mosbesues ndaj përfundimit të procesit të nisur nga Partia Demokratike për ndryshimet statutore.
Në një intervistë për “ABC News”, Patozi thekson se kush pretendon se problemet vijnë thellësisht për shkak të statutit është në rastin më të mirë naiv dhe në rastin më të keq maskon problemin e vërtetë. Ai thekson me forcë se Basha dhe lidershipi drejtues janë të vetmet probleme në Partinë Demokratike.
“PD ka rrëshqitur në këto kuota dramatike kryesisht për shkak të liderishipit të gabuar Lulzim Bashës në këto 5 vitet e fundit. Nuk mendoj se kjo është fundi i ciklit të një partie politike por unë mendoj se kjo është fundi i një lidershipi të gabuar,” deklaroi Patozi.
Patozi nuk i rezervon asnjë fije besimi procesit të nisur nga kryetari Lulzim Basha për ndryshimeve statutore përmes propozimeve të anëtarësisë
“Të jem i sinqertë, nuk kam asnjë shpresë që ky proces deri në Kuvendin e PD do sjelli gjë të re. Kuvendi i ardhshëm i PD do jetë kongres i vazhdimësisë që do noterizojë privatizimin total të PD. Mendoj që ata që kërkojnë zgjidhjen e krizës shumëdimensionale tek disa ndryshime statutore në rastin më të mirë janë naivë politik dhe në rastin më të keq shërbejnë si salvaxhente që Lulzim basha t’ia hedhi dhe të dalë në breg. Kishim statut që për 5 vjet u hodh në plehra. Nuk ka garanci që edhe statuti i ri s’do ketë të njëjtin fat. PD ka vetë një rrugë që të ringrihet. dhe kjo ndodh përmes votës dhe garancive të forta që rregullat e lojës do respektohen,” tha ndër të tjera në intervistë Patozi.
