Ish-kryeministri i Kosovës, Ramush Haradinaj ka qenë ndër personat e helmuar në Deçan, ku u shpreh se ka shfaqur disa probleme shëndetësore, por jo të rënda.
Haradinaj u shpreh situata është disi më e qetë, dhe se është zvogëluar numri i atyre që kërkojnë ndihmë mjekësore.
“Të them të drejtën nuk kam pasur simptoma të mëdha, kam pasur pak por jo të mëdha. Fëmijët e motrës Antigonës, po u prekën rëndë. Shumë të afërm. Nuk është diçka që shpjegohet si gjendje. “Është zvogëluar numri i atyre që kërkojnë ndihmë mjekësore që jep shpresë se do të ndërpritet kjo gjendje. Situatë mjaft e çuditshme dhe jo e zakonshme. Sidomos dy ditët e para kanë qenë të rënda. I kam parë njerëzit duke vuajtur e veçanërisht ishte e dhimbshme t’i shohësh fëmijët duke vuajtur”, u shpreh ish-kryeministri në ‘Kanal 10’ në Kosovë.
Ditën e djeshme, Instituti Kombëtar i Shëndetësisë Publike të Kosovës (IKSHPK) bëri të ditur se nga mostrat e ujit, të marra në Deçan më 12 korrik, janë identifikuar disa baktere që mund të japin indikacion për kontaminim të ujit të pijshëm.
Sipas të dhënave të Drejtorisë së Shëndetësisë në këtë komunë, mbi 1,500 persona kanë kërkuar ndihmë në Qendrën e Mjekësisë Familjare.
