Mbi 5 mijë zyrtarë të lartë dhe deputetë janë të detyruar që të deklarojnë çdo vit pasurinë e tyre. Subjekt i këtij detyrimi ka qenë edhe ish-deputeti Bllako, tashmë i arrestuar për aferën e inceneratorëve.
Në shtator të vitit të kaluar, Bllako ka depozituar në ILDKPKI formularin e deklarimit të pasurisë dhe konfliktit të interesit. Gazeta “Panorama” ka zbardhur dosjen e plotë nga ILDKPKI, ku vërehet se ish-deputeti Bllako nuk disponon as banesë për të jetuar. Ndërkohë nuk deklaron as shpenzime për qira.
Sipas dokumentit të deklarimit të pasurive, Alqi Bllako rezultoi se kishte një llogari me kursimet nga paga që merrte në Agjencinë Kombëtare të UjësjellësKanalizimeve. Në këtë llogari Bllako ka konfirmuar se ka në gjendje 1 milion e 274 mijë lekë të rinj, ose 12 milionë lekë të vjetër. Ndërkohë, në vijim deklaron se ka edhe 6 llogari të tjera bankare, por që shuma në to është relativisht e ulët.
Në njërën prej llogarive në vlerën monetare euro, ish-deputeti ka deklaruar se ka vetëm 44 euro gjendje. Ndërsa në një llogari tjetër në euro rezulton se është debitor 35 cent. Sipas formularit të deklarimit të pasurisë, Bllako rezulton se ka një llogari tjetër në monedhën shqiptare dhe gjendja në të është 80 mijë lekë të rinj, ose 800 mijë lekë të vjetër.
Ndërsa në një tjetër llogari në lekë ai disponon 35 mijë lekë të rinj dhe në një tjetër vetëm 6 mijë lekë të rinj. Ish-deputeti, i cili ndodhet para drejtësisë pasi akuzohet se është i përfshirë në aferën që cilësohet si afera e shekullit nga opozita, nuk deklaron asnjë pasuri tjetër, as automjet apo pronë të paluajtshme.
Ndërkohë, deklaron se në vitin 2018 ka marrë një kredi prej 25 mijë eurosh për të mbuluar shpenzimet në Gjermani.
Ai ka deklaruar se afati i maturimit të kredisë është 5 vite dhe se deri në momentin që ka plotësuar formularin e deklarimit të pasurisë ka paguar vetëm 5633 euro dhe deklaron se ka për të shlyer akoma edhe 14 mijë euro.
PASURIA E BASHKËSHORTES
Ndonëse para trupës së gjyqtarëve ku doli pak ditë më parë mësohet se Bllako ka deklaruar se nuk është i martuar, në dokumentin që Bllako ka depozituar në shtator të vitit të kaluar në ILDKPKI, shtetasja me inicialet O. CC është specifikuar si bashkëshortja e deputetit Bllako dhe ka deklaruar pasuritë që ka në dispozicion.
Nga kqyrja e dokumentit të plotësuar nga vetë ish-deputeti dhe bashkëshortja e tij, kjo e fundit rezulton se është bashkëpronare e një zyre në kryeqytet. Këtë pasuri ajo deklaron se e ka përfituar prej çeljes së trashëgimisë nga i ati, ku ka vetëm 1/6 e pasurisë.
Ndërkohë, në vijim deklaron se ka të kursyer një shumë prej 2.2 milionë lekësh të rinj, ose 22 milionë lekë të vjetër. Këto të ardhura ajo deklaron se i ka krijuar nga paga mujore, rimbursimet dhe dietat nga puna në UNDP (OKB), zyra në Shqipëri.
Gjithashtu, ajo disponon një automjet tip “Reno”, që deklaron se e ka blerë me këste dhe paguan 260 euro në muaj. Deri më tani thotë se ka paguar mbi 3 mijë euro, ndërsa kanë mbetur edhe pak më shumë se 1700 euro. / Panorama
