Ngjarja tronditëse e 26 nëntorit është pasqyruar së fundmi edhe nga televizioni gjerman “ARD”.
Gjatë shkrimit të saj në lidhje me situatën e krijuar pas tërmeti, “ARD” është ndalur edhe tek kostoja e ndërtimit. Sipas kësaj medie, rindërtimi i zonave të shkatërruara mund të arrijë deri në 1 miliardë euro.
“Shifrat zyrtare nuk janë ende të disponueshme, por rindërtimi i zonave të prekura nga tërmeti do të jetë jo vetëm një sfidë njerëzore dhe teknike, por njëherësh edhe e kushtueshme.. Ekspertët thonë se rindërtimi mund të kushtojë deri në një miliard euro. Shumë njerëz dhe kompani në Shqipëri dhe jashtë saj kanë dhuruar tashmë para. Deri më tani, janë mbledhur rreth 15 milion euro”, shkruhet në artikullin e medias.
“ARD” ka komentuar edhe ngritjen e Komitetit Kombëtar të Rindërtimit, për të grumbulluar, koordinuar dhe menaxhuar paratë e mbledhura. Sipas medias, duhet treguar transparencë me fondet e mbledhura, por edhe për shpenzimet që do kryhen në terren.
“Një komision i posaçëm duhet të kanalizojë këto para dhe të sigurojë transparencë, sepse korrupsioni është një problem i madh në Shqipëri. Qeveria ka bërë të ditur plane për ndërtimin e lagjeve të reja në Tiranë, Durrës dhe Kurbin. Në afat të shkurtër, do të ndërtohen deri në 5,000 apartamente, në planin afatgjatë edhe 10,000”, thuhet më tej në shkrim.
