Drejtori i Emergjencave në Bashkinë e Tiranës, Erind Bejko deklaroi se 10 pallate janë shfaqur të pabanueshme. Ndërsa në zonat rurale 350 shtëpi do të rindërtohen.
Në një lidhje me emisionin “Pa Protokoll”, Bejko theksoi se nesër do të mbarojë evidentimi i parë për aktin e konstatimit.
“Në Kombinat ka probleme në shumë pallate. Po ashtu edhe në Kinostudio një pallat është shpallur i pabanueshëm. Në pallatet e tjera që nuk është vendosur, banorët janë lajmëruar të strehohen në vend tjetër.
Në Tiranë brenda në qytet, është një pallat te njësia 4, dy në Kombinat dhe numri mund të shkojë në 10. 350 pallate kanë nevojë për inspektim. Nesër mbarojmë evidentimin e parë për aktin e konstatimit. Ka edhe pallate që do të shemben dhe do të ndërtohen nga e para”, tha ai.
Ndër të tjera, Bejko njoftoi se tërmeti i së martës ka shkaktuar dëme edhe në godinat e institucioneve arsimore. Sipas tij, shkolla në Pezë do të shembet, pasi ka goditje në pikëpamjen e konstruktit.
