Ish-kryekomunari i fshatit famëkeq Lazarat, Dashamir Aliko është zgjedhur si kryetar i degës së Partisë Demokratike në Gjirokastër.
Aliko ka arritur të fitojë përballë kandidatit Gjergj Dudi me një diferencë të thellë.
Dashamir Aliko ka drejtuar Lazaratin në vitet kur fshati ishte i pyllëzuar nga kanabis dhe në qeveri ishte Partia Demokratike.
Qeveria Berisha e lejoi kultivimin e kanabisit në këtë kohë me justifikimin se nuk dëshironte që në përballje me komunitetin të humbte jetën qoftë edhe të një polici të vetëm.
Pas aksionit të madh policor që rrëzoi “mbretërimin” e kanabisit në fshatin më të famshëm shqiptar, në vitin 2014 policia e procedoi penalisht Dasho Alikon në gjendje të lirë për një sërë akuzash të rënda, por prokuroria vendosi të mos lëshojë urdhër arresti për të.
Aliko është akuzuar për mospagim të miliona lekëve borxh ndaj OSHEE-së si dhe ka qenë protagonist në një sherr në Bashkinë e Gjirokastrës ku është goditur me shishe nga rivalët politikë.
Aliko u shpall fitues me 166 vota kundrejt 76 vota të Gjergji Dudit ndërkohë që janë konstatuar 13 vota të pavlefshme. Procesi u monitorua nga deputeti i PD-së në Gjirokastër Tritan Shehu.
