Analisti Milaim Zeka thotë se pritet që Gjykata e Hagës të lëshojë aktakuzë edhe për 80 figura të larta të Republikës së Kosovës.
I ftuar në emisionin “Top Talk”, Zeka u shpreh se përveç Kadri Veselit dhe Hashim Thaçit, pritet që të ngrihet një aktakuzë nga gjykata e Hagës edhe ndaj ish-kryeministrit Ramush Haradinaj dhe ish-kryeministrit të Kosovës Fatmir Limaj.
Sipas analistit, Kosova do të përjetojë një tronditje të rëndë politike.
“Kanë pasur me qindra dëshmitar ndaj Ramush Haradinaj, ndaj Fatmir Limaj dhe janë shpallur të pafajshëm. Unë kam frikë sepse kam shumë frikë në bazë të informacioneve të mija se do të ngrihen aktakuzë përsëri ndaj zotit Haradinaj për së treti herë dhe ndaj Fatmir Limës, sepse kjo gjykatë e themeluar dhe votuar nga parlamenti i Republikës së Kosovës nuk ka asgjë të përbashkët me tribunalin e Hagës. Nëse prokurorët pretendojnë se kanë gjetur dëshmi të reja. Atëherë dhe unë këtu e kam një shqetësim që Kosova, ka përjetuar dhe do të përjetojë një tronditje të rëndë politike. Unë kam informacione se minimalisht 80 figura të larta të Republikës së Kosovës do të akuzohen për krimet e luftës dhe sidomos për krimet e pas luftës”, tha ai.
