Ministrja e Mbrojtjes, Olta Xhaçka, ka vizituar Forcat e Armatosura (FA) të cilat kanë ndihmuar në operacionet e kërkim-shpëtimit pas tërmetit.
Përmes një postimi në Facebook, Xhaçka falenderon FA për shërbimin në këtë rast emergjent për vendin. Ministrja u shpreh se do të punohet më shumë në fuqizimin e ekipeve të kërkim-shpëtimit dhe emergjencave civile, përmes trajnimeve dhe modernizimit të pajisjeve.
“Pa fund mirënjohëse gjithë grave, burrave, vajzave dhe djemve në uniformë të cilët lanë familjet e tyre për t’u shërbyer që në orët e para atyre më në nevojë.
Ende nuk kam mundur të falenderoj personalisht secilin prej tyre si shembulli më kuptimplotë i sakrificës e përkushtimit vetëmohues dhe të përsëris pa u lodhur se është nder dhe privilegj të punosh me ta. Detyra jonë sot është t’i fuqizojmë më shume ekipet tona të kërkim-shpëtimit dhe ato të emergjencave civile përmes trajnimeve dhe modernizimit të pajisjeve”, shkruan ajo në postimin e saj.
Në takimin me trupat e dislokuar në stadiumin “Niko Dovana”, ministrja Xhaçka shoqërohej nga shefi i Shtabit të Përgjithshëm të Forcave të Armatosura, gjeneral brigade Bardhyl Kollçaku dhe komandanti i Komandës Mbështetëse, gjeneral brigade Ndriçim Sallaku.
