Kryeministri i Kosovës, Ramush Haradinaj po tregohet mjaft bujar me punonjësit e qeverisë.
Teksa në fillim rriti pagat, tashmë Haradinaj është përkujdesur që udhëtimet e këshilltarëve politikë jashtë shtetit të bëhen me sa më pak procedura.
Haradinaj nxori një vendim në fundvitin e kaluar që vendoste mundësimin e pajisjes së këshilltarëve me pasaporta diplomatike.
Rritja e numrit të dikastereve qeveritare ka bërë që të rritet edhe numri i këshilltarëve për bartësit e tyre, shkruan Koha Ditore.
Teksa Ministria e Punëve të Jashtme (MPJ) nuk ka treguar sa këshilltarë kanë aplikuar për t’u pajisur me pasaporta diplomatike, në Zyrën e kryeministrit kanë thënë se janë vetëm 15 zyrtarë që mund të pajisen me dokumente të tilla.
