Kryeprokurorja Arta Marku ka bërë një tjetër lëvizje, teksa ka shkarkuar nga detyra kreun e Prokurorisë së Elbasanit, Dritan Gina.
Ky i fundit është bashkëshorti i Rovena Gashit, e cila po ashtu u shkarkuar nga kryeprokurorja pak ditë më parë.
Që nga marrja e detyrës, ka pasur një përplasje mes Markut dhe Gashit, teksa kryeprokurorja shkarkoi menjëherë nga detyra të besuarën e Llallës, ndërsa kjo e fundit e ka paditur, teksa e konsideron të padrejtë këtë shkarkim.
Shkarkimi i Rovena Gashit
Më 29 dhjetor, kryeprokurorja Arta Marku bëri lëvizjen e parë në institucionin që drejton, teksa shkarkoi nga detyra Rovena Gashin, drejtore e njësisë së dekriminalizimit dhe zyrën e marrëdhënieve me Jashtë në Prokurorinë e Përgjithshme.
Rovena Gashi firmosi së fundmi kërkesën dërguar KQZ-së për heqjen e mandatit të Aqif Rakipit dhe Gledion Rahovicës, pasi nuk kishin deklaruar arrestimet në Itali disa vjet më parë.
Në vend të Gashit, Kryeprokurorja Marku ka emëruar Arqile Koçën, një prej kandidatëve për Prokuror të Përkohshëm të Përgjithshëm.
Rovena Gashi padit Arta Markun
Gashi ka bërë një kallëzim pranë Gjykatës Administrative, ndërsa ka kërkuar rikthimin në detyrë si drejtuese e Njësisë së Dekriminalizimit, pasi sipas saj, shkarkimi i saj është i lidhur me propozimin që ka bërë për ndërprerjen e mandateve të Rehovicës dhe Rakipit.
Ajo kërkon që vendimi të pezullohet dhe vendimi për shkarkimin e saj të shpallet i pavlefshëm.
“Vendimi për lirimin tim është absolutisht i pavlefshëm. Të pezullohet vendimi i lirimit si Drejtore e Marrëdhënieve me Jashtë. Prokurorja e Përgjithshme e Përkohshme ka uzurpuar kompetencat e Këshillit të Larte të Prokurorisë. Lirimi nga detyra është bërë pas kërkesës për ndërprerjen e mandatit për Aqif Rakipin dhe Gledion Rehovices” thuhet në padinë e Gashit drejtuar Gjykatës Administrative.
