Qeveria Gjermane është kundër dhënies së aprovimit rregullator për monedhën virtuale Libra të Facebook në Bashkimin Europian, raportoi revista Der Spiegel.
“Mbizotërimi i monedhës virtuale e cila është aktualisht e vetmja në llojin e saj në treg, do të sjellë vështirësi për konkurrentët”, ishte arsyetimi i Qeverisë Gjermane.
Ndërsa Autoritetet Franceze u shprehën se nuk mund të lejohet që Libra të operojë në Europë, ndërsa vazhdojnë shqetësimet për sovranitetin, rreziqet financiare dhe rreziqet e abuzimeve.
Në një takim të Organizatës për Bashkëpunim Ekonomik dhe Zhvillim në Paris, Ministri i Financave të Francës, Bruno le Maire tha: “Ky privatizim eventual i parave përmban rreziqe të abuzimit të pozitës mbizotëruese, rreziqe për sovranitetin dhe rreziqe për konsumatorët dhe për kompanitë”.
Gjithashtu shtoi se: “Në këto kushte ne nuk mund të autorizojmë zhvillimin e Libras në tokën europiane”.
Nebi Xhomaqi / SCAN
