Pas dorëheqjes dhe zhveshjes së uniformës në shenjë proteste, tashmë oficerët e policisë kanë nisur të dorëzojnë armët e shërbimit në Stacionin Policor të Zveçanit. Dorëzimi i armëve dhe fletëdorëheqjeve vjen pas përfundimit të protestës së serbëve në sheshin “Car Lazar” të organizuar nga Lista Serbe.
Policët serbë kanë filluar prej orës 8:00 të dorëzojnë armët dhe uniformat e tyre në stacionin policor në veri të Mitrovicës.
Dorëzimi i pajisjeve të rreth 300 policëve të stacionit verior në Mitrovicë, do të bëhet gjatë ditës së sotme me orare të ndryshme.
Mësohet se rreth 150 policë të tjerë të cilët kanë shërbyer nëpër komunat e tjera veriore të Kosovës, do të dorëzojnë pajisjet e tyre po ashtu sot por nëpër stacionet e këtyre komunave.
Policia e Kosovës ka njoftuar se gjatë së dielës ka pasur dorëheqje të zyrtarëve policorë të komunitetit serb në veri të vendit.
Përmes një deklarate për media, policia tha se disa prej tyre i kanë dorëzuar pajisjet, për të vazhduar me kompletim të procedurave të tjera.
