Dje kreu i PD-së Lulzim Basha dëshmoi përpara prokurorëve belgë lidhur me hetimin për 3.4 milionë eurot e gjetura në automjetet Toyota Yaris në qershor 2018, në Portin e Durrësit. Basha ka qëndruar rreth 90 minuta brenda godinës së SPAK, ku i është përgjigjur prokurorëve të Belgjikës, të cilët prej disa ditësh qëndrojnë në Tiranë për të kryer hetime për dosjen “Toyota Yaris”. Burime të ABC, bëjnë me dije se hetuesit belgë do vijojnë marrjen në pyetje të personave të tjerë, që mund të kenë dijeni lidhur me paratë e sekuestruara në automjetet tip “Toyota Yaris”.
Hetuesit belgë për këtë çështje do marrin 22 persona, të cilët janë miq, familjarë, të të vënëve në akuzë, por edhe persona që dyshohet se janë të përfshirë në aktivitet kriminal. Hetuesit belgë prej tre ditësh ndodhen në vendin tonë, ndërkohë që ato do vijojnë të qëndrojnë deri në përfundimin e marrjes në pyetje.
Kujtojmë këtu se ka qenë Lulzim Basha ai që denoncoi 3.4 milionë eurot të fshehura brenda makinave “Toyota Yaris”, përpara se të mbërrinin në Portin e Durrësit në qershor 2018. Shumat e parave dyshohet se ishin nisur nga Belgjika. Kryedemokrati u pyet nga prokurorët belgë për faktin se si ka qenë në dijeni për 3.4 milionë eurot, përpara se të mbërrinin në vendin tonë.
