Pas arrestimit të presidentit të Federatës Spanjolle të Futbollit, Angel Maria Vijar, presidenti i FSHF-së, Armand Duka, mund të ketë një mundësi tjetër për t’u bërë pjesë e Komitetit Ekzekutiv të UEFA-s, ku ka mbetur një vend vakant. Vijar është arrestuar nga autoritetet në vendlindje për mashtrim me fondet e institucionit dhe ka dhënë sot dorëheqjen zyrtare nga posti që mbante në UEFA, ku ishte zëvendëspresident e njëkohësisht anëtar i Ekzekutivit të kësaj organizate.
Në Ekzekutiv ka mbetur një vend bosh dhe mendohet se kreu i FSHF-së do të jetë përsëri në garë për këtë pozicion . Duka nuk arriti të fitonte të drejtën e pranisë në këtë Komitet prestigjioz gjatë votimeve që u mbajtën në Kongresin i cili u zhvillua në Helsinki, duke dalë i 9-ti në garën për 8 vende. Sipas rregullores së UEFA-s, në rast të një vendi të lënë bosh, Kongresi i radhës duhet të zgjedhë anëtarin e ri, me votim, ose me miratimin e propozimit nga drejtuesit e UEFA-s.
Duka ishte kandidati që mori më shumë vota mes atyre që nuk fituan dhe nuk është çudi që të jetë personi që do të zërë vendin e Vijar në Ekzekutivin e UEFA-s. Kongresi i radhës do të zhvillohet më 26 shkurt 2018 në Bratislavë, ku do të merret edhe vendimi.
