Vjen reagimi i gjyqtarit të Korçës Markelian Kuqo, pas alarmit për bombë në makinën e tij, teksa automjeti ishte i parkuar në afërsi të godinës së Gjykatës.
Në një prononcim për mediat, Kuqo u shpreh jashtë dyerve të Gjykatës se telefonata anonime në adresë të tij ka ardhur nga “grushti kriminel i atdheut”.
“Telefonata erdhi nga grushti kriminel i atdheut tim. Nuk kam asnjë lloj dijenie. Jam i qetë, nuk kam asnjë problem. Nuk kam nevojë për mbrojtje, mbrojtjen e dua nga gazetarët”, tha Kuqo.
Mësohet se alarmi për bombë është dhënë nga një telefonatë anonime, e cila është kryer nga burgu i Drenovës.
Nga ana tjetër, policia njofton se ka marrë një telefonatë, që në mjetin tip “Benz” të gjyqtarit Kuqo, që ndodhej i parkuar në garazhin e gjykatës, ishte vendosur një sasi lënde e dyshuar plasëse.
Uniformat blu dhe Njësia anti-eksploziv raportojnë se kanë rrethuar menjëherë zonën, ku pas veprimeve të kryera nuk është gjetur sasi plasëse.
