Pas akuzave që janë ngritur ndaj Presidentit të Kosovës Hashim Thaçi, ka reaguar edhe ish-kryeministri Albin Kurti.
Ky i fundit u shpreh publikisht se ngritja e aktakuzës nga Gjykata e Hagës, e dëmton reputacionin e Kosovës në arenën ndërkombëtare:
“S’do mend se kjo ngritje e aktakuzës e dëmton reputacionin e Kosovës në arenën ndërkombëtare dhe një takim i tillë nuk do të mund të ishte i dobishëm në rrethanat e tjera të krijuara.
Unë besoj në pafajësinë e UÇK-së dhe mendoj që Kosova është dashur qysh moti ta ketë gjyqësinë e vetë të paanshme që të hetojë, gjykojë të gjitha krimet e luftës dhe të paqes dhe mbi të gjitha ato që janë shkaktuar nga Serbia në Kosovë.
Nuk e di a është ashtu, por, e di që lufta e UÇK-së, është luftë e drejtë, është luftë kundër një agresori dhe okupatori i cili kishte kryer gjenocid në vendin tonë dhe se luftëtarët e lirisë veteranët e invalidët e UÇK-së edhe politikisht edhe historikisht janë në të drejtën e tyre”.
Kujtojmë se sot, Gjykata e Hagës ka ngritur një aktakuzë me dhjetë pika për shqyrtim, në të cilën Presidenti i Kosovës, Hashim Thaçi, Kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
Në aktakuzë pretendohet se Hashim Thaçi, Kadri Veseli dhe të dyshuar të tjerë janë penalisht përgjegjës për afërsisht 100 vrasje të paligjshme.
Krimet e paraqitura në aktakuzë përfshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë.
Gjithashtu rikujtojmë se pas kësaj, Presidenti Hashim Thaçi anuloi pjesëmarrjen në Shtëpinë e Bardhë, Washington, atje ku është parashikuar të zhvillohet më 27 Qershor takimi mes Kosovës dhe Serbisë.
